النهار ده سالني عم سعد:احنا حنعمل ايه بمحاسبة مبارك؟رديت :لازم يتحاسب!!
قال:يابنى مش قصدى كل البلد دلوئتى عايزه تحاسب مبارك واللى معاه,تعرف همه عايزين الفلوس اللى معاهم وصدقنى الفلوس دى مهما كان عددها مش حتيجى فى يوم وليله رغم انى شاكك انهاتكون بالمليارات دى كلها(انته عارف بلدنا بيعملوا من الحبه قبه).
انا: يعنى نسيهم من غير حساب؟قال: مش ده قصدى,انا بقول يسيبوا النيابه والقضاء يشوفو شغلهم واحنا نشوف حل للى بقينا فيه.مش شايف ان البلد كل يوم بتخسر كام مليون؟ بسبب السياحه اللى واقفه والاستيراد اللى واقف والناس اللى كل يوم عماله تعمل مظاهرات عشان زيادة المرتبات ووووالخ
احنا حنخسر قد الفلوس اللى سرقوها اكتر بكتير.
انا: ماهو المجلس العسكرى هوه اللى كان بطئ لو من الاول عمل الحاجات دى كنا خلصنا.
هو: يابنى ماكانش ينفع غير كده عشان نعرف الناس دى اولها واخرها ايه وماتنساس ان البلد كلها كانت فى ايديهم وشوف اول ما المجلس العسكرى مسك قالوا مش عايزين حكم عسكرى رغم ان الناس قالوا مش حنطول وحنسبها كده على طول.صدقنى اللى عمله المجلس ده كان الصح واديك شوفت فى الاستفتا!!!
انا : كلامك ده ممكن ناس تقول عليك من الثورة المضاده.
هو:الكلمة دى مش طبيعيه ومابقتش مبلوعه هو انا لما اقول راى ابقى خاين وعميل؟ يبقى ايه الفرق بينهم وبين مبارك؟
انا : والله بحبك ياعم سعد بس ان شاء الله حتفرج وحتبقى عال.
هو: برد ملؤه الشك. اتمنى .....
هناك فكرة سيطرت على عقلي بعد هذا الحديث الذى دائما ما اتعامل مع اطرافه باخذ الجانب الاخر والمعارض مع انى قد اكون متفق معاه...الثورة المضادة بقت كلمه مش مبلوعه واصبحت سلاح قد يستخدمه البعض ضد مخالفيهم لا ادرى لماذا تذكرت هذه الجمله (معادي للساميه)؟
مجرد خاطر صعد على سطح تفكيري....وايضا (محاكم الثورة ومحاكم التفتيش) ورغبة الكثيرين من الثأر من نظام مبارك رغم انى ارى ان محاكمته بطريقة عاديه فيها من العقاب ماهو كافى للثأر منه واعتقد انه قد يحبس او يعدم كيفما ما سيصدره القضاء فاعتقد انه سيكون قد ثار منا اذاما ظللنا فيما نحن فيه ولم نتقدم فى اتجاه اصلاح ما أفسده نظام مبارك...اتمنى الا ياتي اليوم الذى يشمت فيه مبارك منا.
هذه مجرد مناقشه من مئات المناقشات التي ارصدها واتفاعل معها منذ يوم 28 يناير وما عقبت به ليس راى بل هي مجرد تساؤلات وخواطر...
اسال الله ان يوفقنا لما فيه الخير لبلدنا ولديننا...
0 التعليقات:
إرسال تعليق